Dili makaapekto sa kaso sa House prosecution batok kang Vice President Sara Duterte ang dili pag-atubang sa witness stand ni Edward Fajarda, kanhi special disbursing officer sa Department of Education o DepEd.
Matud sa lead prosecutor nga si Rep. Gerville “Jinky Bitrics” Luistro, gidawat sa depensa ang kadaghanan sa mga stipulation nga gusto unta mapamatud-an sa prosecution pinaagi sa testimonya ni Fajarda.
Tungod niini, dili na ipugos sa prosecution ang pag-atubang ni Fajarda sa hearing samtang nagpaayo kini gikan sa stroke ug uban pang sakit.
Lakip sa mga napagkasabutan nga facts ang pagdumala ni Fajarda sa confidential funds sa DepEd ug mga may kalabotan nga dokumento, lakip ang pag-encash sa tulo ka tseke nga tagsa-tagsa og P37.5 million niadtong 2023. Apil usab niini ang mga certification ug report nga adunay pirma ni VP Sara Duterte.
Ang nahibiling wala pa magkasinabot ang duha ka partido mao ang termino nga gamiton sa paghulagway sa paghatag ni Fajarda og kwarta ngadto sa security officer nga si Col. Dennis Nolasco—kung kini ba “transfer” o “disbursement.”
Matud usab ni prosecutor Rep. Joel Chua, halos tanang impormasyon nga gusto nilang makuha gikan kang Fajarda naapil na sa mga stipulation nga gidawat sa depensa.
Samtang, giingon ni Luistro nga sumala sa medical certificate ni Fajarda, adunay infarct, hypertension ug diabetes ang kanhi opisyal ug gitambagan nga mopahulay pa sulod sa 30 ka adlaw.
Tungod niini, gibawi sa prosecution ang ilang hangyo nga obligahon si Fajarda nga motambong sa hearing. Gisugo usab ni presiding officer Senator Francis Escudero ang pagbawi sa subpoena batok kaniya.
Sumala ni Luistro, gikonsiderar sa maong desisyon ang kahimtang sa panglawas ni Fajarda, samtang napreserba sa mga napagkasabutan nga facts ang importanteng impormasyon nga gusto mapamatud-an sa prosecution.
