GENERAL SANTOS CITY – Magsugod na sa pag-operate ang dialysis center kon Renal Care Replacement Unit sa Dr. Jorge P. Royeca Hospital ugmang adlawa, Abril 3, 2018.
Ug gani, karong hapona gipahigayon ang pormal nga pag-able, nga pangunahan sa mga opisyal ug staff sa nahisgutang tambalanan, ug tambungan sa mga opisyal sa lokal nga panggamhanan.
Una nang gibutyag sa Bombo Radyo ni Gabriel Glenville Gonzales, ang overseer sa Dr. Jorge P. Royeca Hospital nga may lisensya na ang ospital nga mag-operate sa dialysis center.
Sa pagpaklaro pa ni Gonzales nga 90 ka sessions ang walay bayad gumikan sa Philhealth apan 104 sessions ang kinahanglan sa pasyente.
Gumikan niini aron dili bug-at sa bulsa sa pamilya sa pasyente matag session mubayad ug P400 aron pag-abot sa session 91 hangtud mahuman makapadayon na sa dialysis gumikan may pondo na nga unang gihatag.
Kung dili gayud makaluwas ang pasyente i-refund sa pamilya ang unang nabayad.
Kahibaluan nga sa miaging Marso 2 giinspection sa DOH ang dialysis center kung asa giaprobahan gilayon.
Aduna kini 13 ka mga machines sa dialysis center kung asa ang usa ang alang lang sa may infectious types sa kidney disease og ang 11 alang sa outpatients.
Ang usa ang nakareserba sa gi-admit sa Dr. Jorge P. Royeca Hospital nga may emergency cases.
Gibutyag nga aduna nay naka-screen nga mga indigent patients alang sa maong dialysis center.
