Miingon ang defense panel ni Vice President Sara Duterte nga napakyas ang prosecution sa pagpresentar og igo ug lig-on nga ebidensiya nga nagpamatuod nga nag-hire ang Bise Presidente og assassin aron ipapatay si Pangulong Ferdinand Marcos Jr.
Sa iyang closing argument sa ikatulong adlaw sa impeachment trial, giingon ni Atty. Mark Vinluan nga walay laing kompetenteng ebidensiya ang prosecution gawas sa testimonya ni NBI Senior Agent John Mark Calilung, nga matod pa niya, dili igo aron mapamatud-an ang maong akusasyon.
Sa cross-examination, gipakita usab sa depensa ang bahin sa video sa virtual press conference ni Office of the Vice President Chief-of-Staff Zuleika Lopez aron ipakita nga ang giingong hulga ni VP Sara nahitabo human sa pagdetaine kang Lopez.
Dugang pa sa depensa, ang mga pahayag ni VP Sara naggumikan sa giingong hulga batok sa iyang pamilya ilalom sa gitawag nga “Project Romanov,” ug bisan pa man og dili kini ordinaryo nga pamaagi, giingon nilang adunay katarungan ang iyang mga pahayag.
