Gisugdan na sa Department of Education (DepEd) ang tibuok nasud nga recruitment alang sa 10,000 ka School Counselor Associate I positions isip kabahin sa paningkamot nga mapalig-on ang mental health ug psychosocial support services sa mga pampublikong eskwelahan.
Ang pag-hire gibase sa DepEd Order No. 019, s. 2026, nga nagsagop sa qualification standards nga giaprubahan sa Civil Service Commission (CSC) alang sa bag-ong posisyon ubos sa Republic Act No. 12080 o Basic Education Mental Health and Well-being Promotion Act.
Matud sa DepEd, gimandoan na ang mga Schools Division Offices (SDOs) nga nakadawat na sa ilang Notice of Organization, Staffing, and Classification Action (NOSCA) nga magsugod sa pagpuno sa maong mga posisyon.
Aron mapadali ang proseso, gamiton sa tanang SDOs ang Agile Gateway for Appointments and Placements (AGAP) System, usa ka online platform diin ang mga aplikante makapasa sa ilang mga kinahanglanon ug maproseso ang aplikasyon pinaagi sa digital nga pamaagi.
Gipahimutang usab ang mga physical assistance kiosk ug help desk alang sa mga aplikante nga adunay limitadong access sa digital services.
Matud ni Education Secretary Sonny Angara, importante ang pagkuha og School Counselor Associates tungod kay sila mahimong kauban sa pagtabang sa mga estudyante sa ilang adlaw-adlaw nga mental health ug psychosocial needs.
Ang mga bag-ong empleyado maghatag og batakang mental health services, learner support, dokumentasyon, ug referral assistance, isip dugang suporta sa mga registered guidance counselors sa mga pampublikong eskwelahan.
Sumala sa DepEd, ang mga aplikante sa School Counselor Associate I kinahanglan adunay bachelor’s degree sa Guidance and Counseling, Psychology, o may kalabutan nga kurso, lakip ang gikinahanglang units sa guidance, counseling, o behavioral science. Kinahanglan usab sila adunay Career Service Professional Eligibility, apan wala magkinahanglan og work experience o dugang nga training.
Kabahin kini sa implementasyon sa RA 12080 nga nagtumong sa pagpalig-on sa school-based mental health ug well-being programs alang sa mga estudyante sa tibuok nasud.
