Gipahayag sa defense team ni Vice President Sara Duterte nga ilang nasabtan ang desisyon sa Supreme Court nga nagbasura sa petisyon nga nagkuwestyon sa sunod-sunod nga hearing sa House Justice Committee may kalabotan sa impeachment complaint batok sa bise presidente.
Sumala ni Defense Team Deputy Spokesperson Atty. Justin Nicol Gular, ang pagbasura sa Korte Suprema sa maong petisyon dili tungod kay walay lig-on nga basehan o merito ang ilang mga argumento nga anaa sa petisyon.
Hinunoa, matod niya, gibasura kini tungod kay nahimo nang “moot and academic” ang isyu tungod kay nagpadayon na ang impeachment proceedings sa Senado, nga nagsilbi na karon isip impeachment court.
Giingon usab ni Gular nga gipaabot na daan sa depensa ang maong desisyon ug ilang gitahod ang paghukom sa Korte Suprema.
Niadtong Agosto 5, gipagawas sa Supreme Court ang desisyon niini sa mga consolidated petition nga gisang-at atol pa sa paghisgot sa House Justice Committee sa mga reklamo batok kang VP Sara Duterte.
Ang maong mga petisyon gisang-at sa kampo ni VP Sara ug sa ubang grupo sa mga abogado nga nailhang mga tigpaluyo sa pamilya Duterte.
