Sayong pamaskong regalo ang madawat sa gibanabanang 93,000 ka pampublikong magtutudlo sa nasod human nagpagawas ang Department of Budget and Management o DBM og dugang P8.68 bilyon alang sa salary upgrade sa mga kuwalipikadong personnel sa Department of Education o DepEd, isip kabahin sa Expanded Career Progression o ECP System.
Sakop sa gipagawas nga pondo ang salary differential sa mga kuwalipikadong personnel sa DepEd kansang mga posisyon gi-reclassify ubos sa ECP System alang sa fiscal years 2025 ug 2026.
Matud ni Palace Press Officer Atty. Claire Castro, gimando ni Presidente Ferdinand Marcos Jr. ang pagpagawas sa pondo ngadto sa DepEd aron suportahan ang expanded career progression system alang sa mga pampublikong school personnel sa tibuok nasod.
Kabahin kini, matud pa niya, sa padayong pag-ila sa kasinatian, abilidad ug professional development sa mga personnel sa sektor sa edukasyon.
Gipasabot ni Castro nga tumong sa maong lakang nga hatagan ang mga magtutudlo og oportunidad sa career advancement ug mas taas nga sweldo aron dili na sila kinahanglan mobiya sa classroom aron lang makadawat og mas taas nga kita.
Alang sa fiscal year 2027, gisugyot ang P12.9 bilyon nga pondo alang sa ECP, nga 96.6 porsyento nga mas taas kumpara sa pondo niini alang sa 2026.
