Giaprobahan sa Department of Budget and Management (DBM) pinangulohan ni Secretary Amenah Pangandaman ang 16,000 ka bag-ong mga posisyon sa pagtudlo sa mga pampublikong tunghaan alang sa School Year (SY) 2025–2026, isip tubag sa direktiba ni Presidente Ferdinand Marcos Jr. nga palig-onon ang sektor sa edukasyon.
Ang 16,000 ka bag-ong posisyon kabahin sa unang tranche sa target nga 20,000 ka posisyon sa pagtudlo karong tuiga.
Sa laing bahin, 15,343 sa mga bag-ong posisyon mao ang Teacher I (Salary Grade 11).
Ang mga katungdanan sa pagtudlo alang sa Senior High Schools ibutang sa lebel sa dibisyon alang sa mas flexible deployment, subay sa polisiya nga unang gipagawas sa DBM niadtong 2016.
Matod ni Secretary Pangandaman, kini nga lakang isip suporta sa Department of Education (DepEd) aron mapalig-on ang mga trabahante sa Kindergarten, Elementary, Junior High School, Senior High School, ug Alternative Learning System (ALS).
Gibanabana nga moabot sa P4.194 bilyones ang pundo nga gigahin alang sa bag-ong mga posisyon gikan sa built-in appropriations sa DepEd ubos sa 2025 General Appropriations Act.
Sa kasamtangang SY 2024–2025, ang DepEd mitaho nga kapin sa 27.012 ka milyon ka mga estudyante ang na-enrol sa elementarya ug hayskul sa tibuok nasod, apil na ang anaa sa Alternative Learning System.
