GENERAL SANTOS CITY – Gipaniguro sa taga City Treasurers Office nga mapanghatag sa 26 ka barangay ang kopya sa fare matrix nga gilatid sa ordinance number 35 aron maresolba ang hisgutanan sa pletihan sa syudad.
Matud ni Zenaida Eturma ang labaw sa nahisgutang buhatan nga pagsiguro kini nga dili mapeke ang nahisgutang kopya sa taripa nga itugyan sa mga barangay aron ipanghatag sa mga traysikel operator.
Matud ni Eturma nga kinahanglan nga ipa-laminate ang fare matrix ug ibutang sa atubangan nga bahin sa matag traysikel aron makita sa pasahero aron himuon basihan sa pagpaningil ngadto sa mga pasahero.
Usa si Eturma sa mitambong dihang gipahigayon ang press conference miaging semana atul sa pagpagawas sa syudad sa kopya sa taripa.
Una nga gibutyag ni Konsehal Dominador Lagare Jr. nga gibasehan sa paghimo sa maong ordinansa dihang ang syudad ang anaa pa lamang sa alert level 2 kung asa limitado pa ang pagpasakay ug pasahero lakip ang taas nga presyo sa gasolina.
Gani misaaad usab ang Konsehal nga kung padayon nga mo-ubos ang presyo sa gasolina mamahimo nga i-amend ang P18 nga minimum fare pinasibu sa kasamtangang presyo sa petrolyo.
Nasuta nga human sa anunsyo sa Syudad nga ipatuman na ang taripa wala gihapon kini gisunod sa mga traysikel driver tungod walay traysikel nga gapaskin niini.
