GENERAL SANTOS CITY – Nikumpleto sa kasadya ug kalingaw sa 8th Mahin Festival sa Glan ang Bombo Bancarera: Mahin Festival Edition sa Bombo Radyo human kini malampusong gipahigayon kaniadtong Sabado sa Coco Beach, Gumasa, Glan, Sarangani.
Kahibaluan nga gidugok kini sa mga katawhan dili lamang ang taga Glan og uban lugar sa Sarangani apan lakip na mga turista gikan sa ubang dapit sa Mindanao.
Kahibaluan nga 20 ka banca riders ang misalmot kung asa nahimong kampeon ang banca rider nga si Justin Grado nga taga Santa Maria, Davao Occidental kung sa nag-uli kini og P20,000.
Gipasalig niini nga gamiton ang nadag-an alang sa pagpanindot ug pagpakusog pa sa ilang makina sa bangka aron subling muapil sa Bancarera nga ipahigayon na usab sa Bombo Radyo sa Mayo 25 alayun sa Sarangani Bay Festival 2018 nga matigayon gihapon sa Gumasa.
Samtang, P15,000 ang naangkon sa second winner nga si Arsenio Barit nga taga-Colon, Maasim; ug P10,000 alang sa mga third winner nga si Allen Mula, taga-Mati, Davao Oriental.
Wala usab miuli nga luhaan ang mga non-winning riders gumikan nakadawat sila ug tig-P500 nga consolation prize.
Hilabihan ang pasalamat sa Bombo Radyo GenSan sa tanan hinungdan nga nagmalampuson ang bancarera.
