Giduso sa Kamara ang P1,000 buwanang cash aid alang sa mga kasambahay nga adunay tulo ka anak nga nag-eskwela, ubos sa House Bill 11117 o “Kasambahay Parents Support Act.”
Mahimo nilang dawaton ang ayuda isip cash o gamiton kini isip dugang kontribusyon sa Social Security System o SSS.
Target sa panukala nga matabangan ang mga kasambahay nga adunay mga anak nga nag-eskwela gikan Day Care hangtod Senior High School, basta adunay dili moubos sa 85 porsyento nga school attendance ang mga anak.
Sumala sa datos sa DOLE ug PSA, hapit 1.5 milyon ka Pilipino ang nagtrabaho isip kasambahay sa tibuok nasod, ug kadaghanan kanila anaa sa “live-out arrangement.”
Matud ni Abalos, daghan sa mga kasambahay ang kinahanglan mobiya sa ilang kaugalingong pamilya aron maatiman ang pamilya sa ilang mga amo.
Gipasabot pa niya nga 83 porsyento sa mga kasambahay walay social security coverage, busa importante ang dugang nga pinansyal nga suporta alang kanila.
Giklaro usab ni Abalos nga dili apil sa maong programa ang mga miyembro sa Pantawid Pamilyang Pilipino Program o 4Ps.
