GENERAL SANTOS CITY -Patay ang usa ka lalaki human mahagbong sa truck sa basura ug naligsan pa.
Giila ang biktima nga si Gerardo Jumawan, 54 anyos nga residente sa Prk. Riverside, Brgy. San Isidro ning dakbayan.
Sa pakighinabi sa Bombo Radyo kang P/S/Insp. Robert Fores, deputy station commander sa Makar Police Station, gikabutyag nga paingon sa sanitary landfill sa Sinawal ang naasoy’ng truck nga puno sa basura nga gipanag-iyahan sa Brgy San Isidro.
Apan miagi matud pa kini sa Prk 22 Hangar, kung asa may dakong bangag sa dalan tungod sa pag-ulan, kung asa sa dihang pag-agi sa truck, na out-balance ang mga sakay niini ug nahagbong ang dakong sako sa basura apil ang biktima, ug naligsan sa mismong truck.
Gikabutyag nga nadala pa sa balay-tambalanan ang biktima apan gibakwian gihapon sa kinabuhi ug gideklarang dead on arrival.
Giimbestigahan na sa mga otoridad ang naasoy’ng insidente.
Kasamtangan nang gihaya sa lokal nga punerarya ang nasampit nga biktima.
