GENERAL SANTOS CITY – Gikumpirma ni Police Lt. Col. Samuel Cadungon, hepe sa Polomolok Municipal Police Station nga bangi sa yuta ang hinungdan sa nahitabong shootout sa Prk. 1 Brgy. Polo, Polomolok, South Cotabato miaging adlaw, kung asa usa ang namatay ug duha ang angol.
Sa pakighinabi sa Bombo Radyo GenSan, giila ni Cadungon ang namatay nga biktima nga si Sonny Panto, 32-anyos, usa ka guwardiya, samtang ang mga angol ang giilang sila si Leonardo De Guzman alias Muyong, usa ka electrician nga residente sa nasampit nga lugar, ug si Gualberto Ganid, supervisor sa security agency nga gitrabahuan ni Panto.
Una niini, nagtagbo matud pa ang mga nahisgutan aron hisgutan ang bangi ug problema sa luna sa plantasyon, apan nagkalalisay matud pa si De Guzman batok sa kampo nilang Panto ug Ganid kauban ang lain pang tulo ka gwardiya sulod sa compound nga gipanag-iyahan ni Alias Muyong.
Misangko kini sa sinumbagay hangtod nagpinusilay ang mga nasampit.
P/Lt. Col. Samuel Cadungon, hepe sa Polomolok Municipal Police Station
Sa pagkakaron naka-hospital arrest silang Alias Muyong ug si Ganid nga nag-atubang ug kasong homicide ug frustrated homicide, samtang mahimo matud pang magpasang-at usab ug kaso si De Guzman sa mga gwardiya.
