Gikompirma sa Department of Foreign Affairs (DFA) nga usa sa mga nag-unang hisgutanan sa gikatakdang bilateral consultation mechanism tali sa Pilipinas ug China mao ang panagbangga sa duha ka Chinese vessels sa Bajo de Masinloc.
Matod ni DFA Undersecretary Theresa Lazaro, lakip sa kasagarang hisgutan sa maong bilateral talks ang tanang isyu sa South China Sea, busa gipaabot nga maklaro na ang maong insidente.
Gidugang niini, ang maong mekanismo usa ka epektibo nga agianan sa komunikasyon tali sa duha nga mga nasud.
Samtang, usa ka semana human sa insidente, ang mga barkong iggugubat gikan sa Pilipinas, Australia, ug Canada nagpahigayon og joint sailing duol sa Lubang Island, Mindoro niadtong Agosto 17.
Kabahin kini sa Philippine-Australia Alon Military Exercises.
Matod sa Philippine Navy, epektibo ang maong mga exercises sa pagpamenos sa mapugsanon nga aksyon gikan sa China.
Namahayag si Rear Admiral Roy Vincent Trinidad nga ilang namatikdan nga mas mabinantayon ang kinaiya sa China kung adunay presensya sa mga langyaw nga barkong iggugubat sulod sa maritime domain.
Iyang gipasalig nga ang Armed Forces of the Philippines andam mohatag og suporta kon gikinahanglan.
Samtang, ang security analyst nga si Renato de Castro nipasidaan nga posibleng mubalos ang China batok sa pwersa sa Pilipinas aron ipakita nga dili daling maulawan ang Beijing.
