GENSAN – Giawhag sa City Health Officer sa General Santos City nga si Dr. Lalaine M. Calonzo ang tanang ginikanan nga dal-on ang ilang mga anak nga may edad unom ka bulan hangtod 19 ka bulan sa ipahigayon nga Chikiting Ligtas Supplemental Immunization Activity sa mga gitakdang vaccination sites sa mga Rural Health Units (RHU) sa matag barangay sa siyudad karong umaabot nga Enero 19, 2026, tungod kay hinungdanon ang pagpabakuna batok sa mga sakit sama sa tigdas ug rubella nga padayon gihapong hulga sa kaluwasan ug kahimsog sa mga bata.
Matod ni Dr. Calonzo, ang Measles-Rubella (MR) vaccine luwas, epektibo ug dugay nang gigamit dili lamang sa Pilipinas kondili sa tibuok kalibutan, ug bisan pa man sa kabalaka sa pipila ka ginikanan mahitungod sa posibleng side effects, iyang gipaklaro nga normal lamang ang pagkahilanat human sa bakuna ug dili kini delikado kon itandi sa seryosong risgo nga madala sa tigdas ug rubella.
