GENERAL SANTOS CITY – Misentro sa sunod sunod nga kaso sa krimen dinhi sa dakbayan sa Heneral Santos ang panagpulong ni Mayor Lorelie Pacquiao tali sa mga personahe sa General Santos City Police Office sa pagpanguna ni City PNP Director Col. Paul Bometivo.
Gipatuki ni Mayor Pacquiao ang mga nahimong bahad sa peace and order sama na lamang sa pagpangawat, hold-up, shooting incidents ug uban pang krimen og nadunggan ang mga gihimong aksyon sa kapulisan.
Kini pinaagin sa presentasyon nga gihimo sa mga Chief Of Police sa nagkadaiyang Police Station ug unit sa kapulisan. Gipaabot sa bag-ong lingkod nga mayor ang hangyo niini nga tibuok kooperasyon sa GSCPO aron masiguro nga mapugngan ang unsa maong bahad sa kriminalidad.
Sa pamahayag ni Mayor Pacquiao, angayang matutukan pagmaayo ang kaluwasan og seguridad sa mga katawhan apil ang pagpaubos sa crime rates sa syudad.
Dungan niini misaad nga ilang ihatag ang mga panginahanglan sa kapulisan aron masigurong mapugngan ang unsa maong bahad sa kriminalidad.
Sa bahin sa GSCPO, ilang gisiguro usab nga madugangan ang mga strategic police outpost nga magamit sa pagbantay.
Kahibaloan nga gikabalak-an na sa pipila ka mga residente ug ilang kabanay ang ilang seguridad human ang serye nga mga krimen sa dakbayan.
