GENERAL SANTOS CITY – Gikumpirma ni Lt. Daryl Cansancio, tigpamaba sa 73rd Infantry Batallion Philippine Army nga usa ka bag-ong engkwentro na usab tali sa ilang tropa og rebeldeng NPA ang natigayon sa Upper Suyan Malapatan Sarangani Province.
Kini human sa ulahing engkwentro nga natigayon sa Brgy Little Baguio, Malita, Davao Occidental miaging adlaw.
Matud ni Lt. Cansancio, mukabat sa 20 hangtud 25 ka armadong kalalakihan ang nakabayluanaay og buto sa pusil sa kasundalohan nga mga miyembro sa Guerrilla Front 71 sa NPA.
Human ang dies minutos nga bakbakanay, paspas nga miatras ang walhong grupo hinungdan nga nahiblin ang usa ka bag pack nga adunay sulod nga mga subersibong dokumento, food pack og personal nga mga butang.
Sumala pa sa opisyal, atul sa gipahigayong clearing operation, nakit-an sa encounter site ang mga pat-ak sa dugo hinungdan nga gilauman nga adunay samaron sa bahin sa NPA.
Gisiguro ni Lt. Cansancio nga nakontrola na ang sitwasyon luyo nga padayon ang gipahigayong paggukod sa mga rebeldeng grupo.
Gisiguro usab nga walay nadamay nga mga sibilyan tungod layo sa komunidad ang natigayong engkwentro.
