Kasamtangang anaa sa tambalanan ang usa ka babaye human gipusil sa kaugalingong silingan samtang nagkuha lang og tubig gawas sa ilang balay sa Purok Talitay, Rosary Heights 7, Cotabato City kagahapon sa hapon, Hunyo 29.
Giila sa Cotabato City Police Station 2 ang biktima nga si Fatima Matiman, 38 anyos.
Samtang ang suspek giila nga si Aron Guiapal, silingan sa biktima.
Sa imbestigasyon, gilayong niresponde ang kapulisan human makadawat og report sa pagpamusil.
Ilang napalgan ang samdan nga biktima nga dunay samad pinusilan sa walang bahin sa dughan ug tiyan.
Gihatod dayon siya sa tambalanan aron matambalan.
Nasayran nga dugay na nga nagkalalis ang biktima ug ang suspek tungod sa yanong panag-away tungod sa halayan nga giingong maoy hinungdan sa maong insidente.
Sa pagkakaron, nagpahigayon og hot pursuit operation ang kapolisan batok kang Guiapal kinsa misibat human sa krimen.
