Ang grupo sa Philippine Animal Welfare Society (PAWS) nipahinumdom nga ang mga binuhi dili regalo sa Pasko.
Matod sa grupo, ang mga binuhing hayop dili mga dulaan nga mahimo ra nga ihatag nga regalo karong Pasko, ilabi na sa mga tawo nga dili pa andam sa dugay nga pasalig.
Gipadayon usab sa grupo nga ang mga hayop dili sama sa materyal nga mga regalo nga gihatag lamang; hinoon, silang tanan adunay kaugalingong kinabuhi nga nagkinahanglan sa mental, emosyonal, ug pisikal nga pag-atiman.
Ang grupo nag-apelar sa publiko nga ang pagbuhat og maayo dili lang para sa mga tawo kondili alang usab sa mga binuhi nga kasagarang nagdepende sa pasalig sa bisan kinsa nga nag-atiman kanila.
Gipakita usab nila ang pipila ka mga higayon nga ilang nabantayan sa bag-ohay nga mga tuig diin ang mga indibidwal nakalimtan ug gipasagdan ang regalo sa hayop nga ilang nadawat pagkahuman nawala ang kahinam.
Tambag pa sa grupo sa mga indibidwal nga nakadawat og regalo nga hayop karong Pasko nga kung dili nila matubag ang ilang mga panginahanglan, mas maayo nga balibaran o iuli ang regalo sa matinahuron nga paagi.
