Gipadayag ni prosecution counsel ug legal spokesperson Atty. Benjamin Tolosa Jr. nga dili angay baliwalaon ang mga alegasyon nga gibutyag ni kanhi Senador Antonio “Sonny” Trillanes IV, ilabina kay matod pa seryoso kaayo kini.
Matud ni Tolosa, susihon sa House prosecution panel ang mga pahayag ni Trillanes ug itandi kini sa mga opisyal nga dokumento nga gilauman nilang ipresentar sa ilang mga sunod nga testigo sa impeachment trial ni Vice President Sara Duterte.
Bisan dili direktang magamit isip ebidensya sa pagdungog ang mga pahayag ni Trillanes tungod kay gihimo kini gawas sa korte, giinsistir ni Tolosa nga dili kini angay pasagdan tungod sa kabug-at sa mga alegasyon.
Lakip sa mga gibutyag ni Trillanes ang kapin P300 milyon nga giingong miagi gikan sa mga kumpanyang nakabase sa China ngadto sa kumpanyang gipanag-iya ni Manases Carpio, bana ni VP Sara Duterte; kapin P100 milyon sa bank accounts nila Duterte ug Carpio; ug usa ka P80-milyong cash transaction sulod lamang sa usa ka adlaw.
Gilauman nga motestigo sa Lunes si Anti-Money Laundering Council Executive Director Atty. Ronel Buenaventura, nga motuki sa mga transaksiyon sa bank accounts sa mag-asawang Duterte-Carpio.
Sunod nga motestigo ang mga representante sa mga bangko ug insurance companies nga nagdumala sa accounts o financial instruments sa mag-asawa, una motestigo ang usa ka opisyal sa Bureau of Internal Revenue bahin sa ilang income net of taxes.
