Napugos sa paglanding ang Condor Airlines Flight DE 3665 nga naggikan sa Corfu, Greece, human nagkalayo ug mibusikad ang makina niini samtang naglupad sa ere sa Brindisi, Italy.
Naputos sa kabalaka ang 273 ka sakay ug 8 ka crew sa Boeing 757 human nakasinati sa turbulence sa ilang paglupad sa gitas-on 36,000 feet.
Misamot ang kayagaw sa mga pasahero dihang nakit-ang nagkalayo na ang tunga-tunga nga bahin sa abyon, ug laing pagkalayo sa usa sa paku sa eroplano.
Subay sa report, usa ka pasahero ang naka-text sa iyang minahal sa kinabuhi og “goodbye messages” tungod sa pagtuo nga mahagsa ang gisakyang eroplano. Hinoon, namani-obra og tarong sa piloto ang eroplano ug luwas nga nag-emergency landing sa Italya.
Walay bisan usa sa mga pasahero ug crew ang samaran sa insidente.
