Naghatag og bag-ong paglaom sa mga biktima sa kampanya kontra droga ang umaabot nga pagsugod sa pagtaral kang kanhi President Rodrigo Duterte sa International Criminal Court o ICC.
Sa eksklusibong pakighinabi sa Bombo Radyo Philippines, miingon si Truth Commission spokesperson Carlos Conde nga importante ang pagsugod sa trial tungod kay naghatag kini og higayon sa mga biktima nga ipadayag ang ilang mga kasinatian atubangan sa international community.
Matod ni Conde, dili lamang ang mga pamilyang direktang nalambigit sa kaso sa ICC ang naglaom nga makab-ot ang hustisya, kondili apil usab ang ubang pamilya nga naapektuhan sa kampanya kontra droga.
Giangkon usab niya nga wala pa mahibaloi kon unsa kadugay ang pagtaral ug unsay mahimong desisyon sa mga judge apan dako nang butang nga madungog ang mga kasinatian sa mga biktima.
Gikatakdang sugdan sa Nobyembre 30, 2026 ang pagtaral kang Duterte sa ICC may kalabotan sa mga kasong crimes against humanity, lakip ang murder ug attempted murder, nga nalambigit sa giingong mga pagpatay atol sa iyang paglingkod isip mayor sa Davao City ug Presidente sa Pilipinas.











