Mipanaw na kagahapon Biyernes, Nobyembre 20, ang kanhi PBA player nga si Peter June “PJ” Simon sa edad nga 46 human giingong nakasinati og medical emergency samtang nagdula og basketball sa Mindanao.
Gikumpirma sa iyang kanhi team nga Magnolia Hotshots karong sayo sa buntag pinaagi sa usa ka tribute nga gipatik sa social media.
Nagdula si Simon sa prangkisa sa Purefoods gikan 2004 hangtod 2020 ug nakadaog og walo ka kampiyonato sa PBA, lakip na ang Grand Slam niadtong 2014 kauban ang San Mig Coffee Mixers.
Nailhan siya sa angga nga “The Scoring Apostle” tungod sa iyang abilidad sa pag-iskor, ilabina sa mga clutch shot ug tukmang midrange shooting. Mipahibalo siya sa iyang pagretiro niadtong 2020.
Niadtong Disyembre 2021, giretiro sa Magnolia Hotshots ang iyang jersey number 8, kauban ang iyang kanhing kauban sa team nga si Marc Pingris.
Human sa iyang pagdula sa PBA, miduyog usab siya sa Davao Occidental aron makigdula sa Maharlika Pilipinas Basketball League o MPBL.
Nagpaabot usab og pahasubo ang Magnolia Hotshots ngadto sa pamilya ug mga minahal sa kinabuhi ni Simon, nga ilang giila isip usa sa mga halangdong magdudula nga nakahatag og dungog sa ilang team.











