Sa ikatulong higayon sulod niining semanaha, giatake na usab sa pwersa sa Ukraine ang Crimean Bridge, sumala sa usa ka opisyal sa Russia.
Gikumpirma kini ni Moscow-installed Crimea Governor Sergei Aksyonov, diin temporaryo niyang gipahunong ang agianan sa mga sakyanan sa maong tulay.
Ang Crimean Bridge mao ang bugtong koneksyon tali sa Taman Peninsula sa Russia ug Crimea, nga giokupar sa pwersa sa Russia niadtong 2014.
Sa miaging mga adlaw, duha pa ka pag-atake ang una nang natala sa maong tulay, diin adunay bahin niini nga naguba ug nahugno ngadto sa katubigan sa Kerch Strait.
Dugay nang gikonsiderar sa Ukraine nga target ang maong estruktura tungod sa politikal nga kahinungdanon niini sa Moscow ug sa papel niini isip agianan sa suporta sa militar sa Russia.
Natala usab ang maong mga pag-atake samtang nagpadayon ang panagtigom nila Russian President Vladimir Putin, US President Donald Trump ug Chinese President Xi Jinping atol sa ika-33 nga Asia-Pacific Economic Cooperation o APEC Economic Leaders’ Meeting sa Shenzhen, China karong Huwebes.
Samtang, nagpadayon ang pagpagawas sa Ukraine og mga pasidaan batok sa posibleng pag-atake sa kahanginan sa pipila ka distrito sa gawas sa ilang kapital nga Kyiv.
Kini human upat ka tawo ang namatay sa drone attack sa Russia sa siyudad sa Odesa niadtong Miyerkules, sumala kang Governor Oleh Kiper.
Lakip usab sa mga taktika sa Russia ang pag-atake sa mga tulay sa Ukraine. Sa miaging mga adlaw, gisulayan usab sa ilang pwersa nga puntiryahon ang tulay sa ibabaw sa Dnipro River sa Kyiv, nga hinungdan sa pagkalangan sa trapiko ug pagkawala sa suplay sa kuryente ug tubig sa rehiyon.











