Wala nadismaya ang Pilipinas bisan wala makompleto karong tuiga ang dugay nang gipaningkamotan nga Code of Conduct (COC) sa South China Sea tali sa Association of Southeast Asian Nations (ASEAN) ug China.
Bisan wala makab-ot ang tumong nga mahuman ug mapinal ang kasabutan ubos sa pagpangulo sa Pilipinas isip ASEAN Chair karong 2026, nagpabiling positibo ang gobyerno nga mahuman gihapon ang negosasyon.
Matod ni Department of Foreign Affairs (DFA) Secretary Theresa Lazaro, walay rason nga madismaya ang nasud tungod kay dako na ang nahimong pag-uswag sa negosasyon, diin 80% na sa mga probisyon sa draft agreement ang nasabutan sa mga partido.
Sumala kang Lazaro, nagkinahanglan lamang og dugang panahon aron masulbad ang nahibiling mga isyu ug mapalambo ang usa ka makahuluganon ug pinal nga kasabutan.
Gipasiugda usab sa kalihim nga dili angay isipon nga kapakyasan ang wala pagkakompleto sa COC ubos sa pagpangulo sa Pilipinas, tungod kay natuman na sa nasud ang bahin niini sa pagpalambo sa negosasyon.
Tungod niini, magpadayon ang mga panaghisgot ubos sa Singapore, nga maoy sunod nga mangulo sa ASEAN.











