-- ADVERTISEMENT --

Gitinguha sa administrasyon nga mapaubos ang 12.5% nga taripa nga gipahamtang sa Estados Unidos sa mga produktong Pilipino atol sa gikatakdang tigom nila ni Pangulong Ferdinand Marcos Jr. ug US President Donald Trump karong Miyerkules, Nobyembre 18.

Sumala kang Trade Secretary Cristina Roque, usa sa mga nag-unang hisgotan sa duha ka lider ang 12.5% nga taripa sa Washington sa mga produktong gi-eksport sa Pilipinas ngadto sa Amerika.

Matod ni Roque, gitinguha sa gobyerno nga mapaubos ang maong taripa aron mas mapalapad ang pag-eksport sa mga produkto sa nasud, dili lamang sa merkado sa Amerika kondili apil usab sa ubang mga nasud sa kalibotan.

Tumong usab niini nga mapalig-on ang abilidad sa mga produktong Pilipino nga makigkompetensya sa internasyonal nga merkado.

Kahinumdoman nga gikonektar sa Estados Unidos ang pagpahamtang sa taripa sa giingong kapakyasan sa Pilipinas sa pagpatuman og igo nga mga lakang batok sa pagsulod sa mga produktong gihimo pinaagi sa pinugos nga pagpabuhat o forced labor.

-- ADVERTISEMENT --

May kalabotan niini, gipadayag ni Roque nga napadala na ngadto sa Estados Unidos ang Joint Administrative Order o JAO sa gobyerno nga gitumong sa pagtubag sa maong mga kabalaka.

Nagalaum ang kalihim nga maapil kini sa hisgotanan kalabot sa posibleng pag-usab sa kasamtangang taripa.