ALABEL, SARANGANI – Gipahinumdoman ni Alabel Mayor Lilibeth “Ybing” Salarda ang mga lumulupyo sa Barangay Alegria sa kamahinungdanon sa pagsunod sa mga ordinansa sa barangay ug sa lokal nga panggamhanan aron mapadayon ang kalinaw, kahusay ug disiplina sa komunidad.
Gipadayag kini sa mayor atol sa pagsaulog sa ika-68 nga Foundation Anniversary ug unang Tinubdan Festival sa Barangay Alegria, Alabel, Sarangani Province, niadtong Domingo sa buntag, Nobyembre 15, nga gipahigayon sa Alegria Covered Court.
Gipasalamatan usab ni Salarda ang mga opisyal sa barangay tungod sa ilang padayon nga pagserbisyo ug pagpatuman sa mga programa alang sa kaayohan sa mga residente.
Samtang, gipasiugda ni Municipal Administrator Vic Paul “Nonoy” Salarda ang kamahinungdanon sa panaghiusa ug koordinasyon tali sa barangay ug sa lokal nga panggamhanan aron mas mapalambo ang serbisyo publiko.
Kabahin usab sa kalihokan ang State of Barangay Address ni Punong Barangay Hilario “Larry” Villamora, diin iyang gitaho ang mga nahimo, programa ug proyekto sa administrasyon sa barangay.
Mitambong usab sa maong kalihokan si Sarangani Provincial Board Member Gwynn Lazaro Singcoy isip representante ni Governor Rogelio “Ruel” Pacquiao, kauban ang mga representante sa DILG, MDRRMO, kapulisan, mga opisyal sa barangay ug mga residente.
