Opisyal nang gisugdan karong adlawa Nobyembre 15, ang 49th Association of Southeast Asian Nations o ASEAN Summit nga molungtad hangtod Nobyembre 17.
Gisugat ni Pangulong Ferdinand Marcos Jr. ug First Lady Liza Araneta Marcos ang mga lider sa nagkalain-laing nasod nga mitambong sa summit sa Philippine International Convention Center.
Sa iyang mensahe, gipasiugda sa Presidente ang desisyon nga ipadayon ang summit bisan pa sa epekto sa krisis sa Middle East sa transportasyon, enerhiya ug suplay sa pagkaon.
Matud pa niini, mas gikinahanglan ang panagtigom aron magkahiusa ang mga nasod sa ASEAN sa pagpangita og konkretong solusyon sa mga hagit nga giatubang sa rehiyon.
Pormal usab nga gitugyan sa Presidente ngadto sa ASEAN Secretary General ang Digital Economy Framework Agreement o DEFA.
Gilauman nga sunod-sunod ang mga miting ug diskusyon lakip ang ASEAN Summit Retreat ug mga tigom kauban ang mga representante sa parlamento, negosyo ug kabatan-onan sa ASEAN.
