Gipahibalo ni Ombudsman Jesus Crispin Remulla nga mas hugtan pa ang gihimong lifestyle check sa mga opisyal sa Bureau of Internal Revenue (BIR) ug Bureau of Customs (BOC).
Gipadayag kini ni Remulla atol sa iyang pagtambong sa Town Hall Meeting sa Philippine Chamber of Commerce and Industry (PCCI) sa Taguig kagahapon, Nobyembre 14, dungan sa pagpanumpa sa katungdanan sa bag-ong natudlong mga commissioner sa BOC ug BIR.
Matud sa Ombudsman, tumong sa lifestyle check nga mapanalipdan ang buhis sa katawhan ug ang mga negosyanteng posibleng naapektuhan o nabiktima sa mga ilegal nga kalihokan.
Gibutyag usab ni Remulla nga nakadawat siya og mga report nga adunay mga kawani sa duha ka ahensya nga naningil og dagkong kantidad sa buhis gikan sa mga negosyante.
Apan, sumala kaniya, wala matod pa maghatag og hustong resibo ang maong mga kawani sa ilang mga kolektahon.
Gipasiugda ni Remulla nga ang tanang transaksyon sa gobyerno kinahanglan adunay resibo, ug ang pagpaningil nga walay maipakitang resibo mahimong isipon nga korapsyon.
