Walo na ang namatay samtang labing menos 17 ang naangol human kalit nga nahugno ang usa ka tulo-ka-andana nga building sa Brooklyn, New York kagahapon, Nobyembre 11.
Matod sa mga otoridad sa New York City, nahitabo ang insidente sa Flatbush Avenue sa Brooklyn, diin ang maong building nga adunay mga apartment ug tindahan sa ground floor nahugno paingon sa kasikbit nga construction site.
Lakip sa mga naangol ang tulo ka bombero nga miresponde sa insidente, samtang adunay pipila ka mga biktima nga nadala sa ospital alang sa medikal nga pag-atiman.
Kapin sa 250 ka mga emergency responders, lakip ang mga bombero, pulis ug medical personnel, ang gipadala sa lugar aron pangitaon ang posibleng mga tawo nga natanggong ilalom sa nagkaguliyang nga mga bato, kahoy ug uban pang debris.
Nagpadayon ang search and rescue operation bisan pa sa delikadong kahimtang sa nahugno nga estruktura ug posibilidad nga adunay dugang nga mga bahin niini nga mahugno.
Samtang, giimbestigahan na sa mga otoridad ang posibleng kalambigitan sa excavation ug construction work sa kasikbit nga lote sa pagkahugno sa building.
Gipasabot sa mga opisyal nga wala pa matino ang eksaktong hinungdan sa insidente.
