Miangkon si Atty. Anel Martin Antero nga nahimo siyang kabahin sa legal team ni Vice President Sara Duterte kalabot sa mga kasong giatubang sa Bise Presidente.
Nahitabo kini atol sa cross-examination ni House Prosecutor Atty. Amando Virgil Ligutan sa impeachment trial niadtong Huwebes, Nobyembre 12, diin gipangutana si Antero kon maisip ba siyang lig-on nga tigpaluyo ug tigdepensa ni Duterte.
Gikumpirma usab sa testigo nga dugay na niyang higala sila ni Duterte ug ang bana niini nga si Atty. Manases Carpio.
Isip kabahin sa pagpangutana, gipakita ni Ligutan ang pipila ka social media posts ni Antero nga nagpakita sa iyang pagsuporta sa Bise Presidente. Gisusi sa prosekusyon ang personal nga relasyon sa testigo kang Duterte ug kon adunay kalabotan kini sa iyang pagka-kabahin sa defense team.
Si Antero ang ikalimang testigo nga gipresentar sa depensa atol sa impeachment trial. Gipa-atubang siya aron maghatag og katin-awan sa pipila ka transaksiyon nga may kalabotan kang Carpio, lakip na ang kapin 205 mil pesos nga bayranan sa usa ka restawran sa Tokyo, Japan niadtong Mayo 19, 2023.
Sumala sa depensa, kauban ni Antero si Carpio sa maong biyahe ug gigamit ang credit card sa ulahi sa pagbayad sa bayranan sa restawran. Gipasabot usab sa testigo nga nagtinabangay sa pagbayad ang mga kauban sa grupo ug gibayran nila sa ulahi ang tagsa-tagsa nilang bahin.
Samtang, nakapunting ang kasamtangang impeachment trial sa Article II sa reklamo batok kang Duterte, nga naghisgot sa mga alegasyon sa unexplained wealth ug sayop nga deklarasyon sa iyang mga kabtangan sa Statement of Assets, Liabilities and Net Worth o SALN.
