Gisuportahan sa mga dagkong partido politikal sa House of Representatives ang pagbutyag sa publiko sa mga pondo nga gigahin sa matag distrito ubos sa gisugyot nga 2027 national budget.
Matud sa mga magbabalaod, kinahanglan silang andam sa pagpatin-aw kung giunsa pagbahin ang pondo ug unsang mga proyekto ang paggastohan niini.
Lakip sa mga partidong nagpahayag og suporta ang National Unity Party (NUP), Nationalist People’s Coalition (NPC), Lakas-CMD, Partido Federal ng Pilipinas (PFP) ug Nacionalista Party (NP).
Matud ni Camarines Sur 4th District Representative Arnie Fuentebella sa NPC, wala silay pagsupak nga ipahibalo sa publiko ang mga proyekto ug pondong gigahin alang sa tagsa-tagsa nilang distrito.
Gipasalig usab ni Negros Oriental 3rd District Representative Janice Degamo sa Lakas nga walay gitago ang ilang mga miyembro.
Gisuportahan usab ni Davao del Norte 2nd District Representative JM Lagdameo sa PFP ang paghatag og access sa publiko sa impormasyon bahin sa badyet, lakip na ang paggamit sa online budget portal sa Kamara.
Samtang, matud ni Surigao del Sur 1st District Representative Romeo Momo Sr. sa Nacionalista Party, wala silay problema sa pagbutyag sa mga alokasyon, apan wala kini magpasabot nga kinahanglan parehas ang kantidad sa pondo nga madawat sa matag distrito tungod kay nagkalahi ang ilang panginahanglan, populasyon, geograpiya ug risgo sa mga kalamidad.
Gipasiugda usab ni Bataan 2nd District Representative Albert Garcia sa NUP ang mga repormang gipatuman sa Kamara aron mas mapalapad ang access sa publiko sa mga dokumento ug pagdungog bahin sa badyet.
Samtang, miingon usab si FPJ Panday Bayanihan Party-list Representative Brian Poe nga andam usab ang mga party-list nga mopatin-aw bahin sa ilang mga alokasyon.
