Nagpagawas og pahimangno ang Philippine Space Agency o PhilSA kalabot sa posibleng pagkahulog sa mga debris sa rocket sa katubigan sa nasud human sa bag-ong paglusad sa rocket sa China karong Lunes.
Matod sa PhilSA, gilusad sa China ang Long March 12 rocket gikan sa Hainan International Commercial Launch Center sayo ning kabuntagon.
Gilauman nga mahulog ang mga debris sa gitakdang drop zone nga anaa sa gilayong 25 nautical miles gikan sa Puerto Princesa, Palawan ug 19 nautical miles gikan sa Tubbataha Reefs Natural Park, sulod sa katubigan nga sakop sa Pilipinas.
Bisan wala damha nga mahulog kini sa kayutaan, nagpahimangno gihapon ang ahensiya sa posibleng peligro nga mahimong madala niini sa mga barko, eroplano, mananagat og uban pang mga sakayang pandagat nga anaa sa maong lugar.
Gipahimangnoan usab ang publiko nga ipahibalo dayon sa mga otoridad o sa lokal nga mga opisina kung adunay makit-an nga mga debris sa maong rocket.
Gidid-an usab ang paghawid niini tungod sa posibleng makadaot sa panglawas nga dala sa makahilong kemikal gikan sa rocket fuel.
Samtang, giawhag sa PhilSA ang mga kauban niini sa internasyonal nga komunidad nga makigtambayayong aron masiguro ang kaluwasan sa pagpatuman sa maong mga proyekto.
