Gidakop ang tulo ka indibidwal sa operasyon sa kapulisan tungod sa giingong ilegal nga pagpanag-iya og mga armas sa Barangay Pababag, Bongao, Tawi-Tawi, niadtong Nobyembre 7, 2026.
Giila ang mga suspetsado sa mga alyas nga “Tuyong,” “Tayson,” ug “Raymart,” nga anaa na hustong edad.
Sumala sa Tawi-Tawi Police Provincial Office, gisugdan ang operasyon human mosang-at og reklamo si ASN Rehan A. Jaid, miyembro sa Philippine Coast Guard nga nadestino sa Tawi-Tawi, kalabot sa iyang nawalang Glock 19 pistol nga giingong gibaligya kang alyas “Tuyong.”
Nasakmit sa operasyon ang unom ka armas nga gilangkuban sa duha ka M16 rifles, tulo ka M14 rifles, ug usa ka 9mm Glock 19 pistol.
Narekober usab ang nagkalain-laing magazine nga adunay kinatibuk-ang 256 ka bala, lakip ang duha ka army-green bandolier.
Atubangon sa mga gidakop ang kaso nga paglapas sa Republic Act No. 10591 o Comprehensive Firearms and Ammunition Regulation Act.
Anaa na sa kustodiya sa kapulisan ang mga suspetsado, lakip ang mga nakumpiskang ebidensya, alang sa hustong dokumentasyon ug pagsang-at sa kaso.
