Natangtang sa trabaho ang usa ka Italian chef sa Brisbane, Australia human siya midumili sa pagbutang og pinya sa pizza tungod kay giisip niya kini nga insulto sa iyang kultura isip Italyano.
Si Davide Tamburella, kanhi chef sa La Costa restaurant, gitangtang niadtong Mayo human makadawat og mga reklamo ang management bahin sa iyang pamatasan, lakip ang pagdumili sa paghimo og ham-and-pineapple pizza.
Matud ni Tamburella, supak sa iyang kultura ang pagbutang og pinya sa pizza. Sumala sa Australia’s Fair Work Commission, tulo na ka higayon siyang midumili niini sulod sa upat ka tuig.
Gawas niini, giingong naggamit usab siya og bastos nga mga pulong sa trabaho. Wala na gipadayon ang iyang reklamo batok sa pagkakatangtang tungod kay nalapas na niya ang deadline sa pagsang-at niini.
Sa pagkakaron, nagtrabaho na siya sa laing restaurant sa Brisbane diin walay pizza nga adunay pinya isip toppings.
