Nagpasalamat apan balibaran sa nailhang constitutional law professor nga si Atty. Ralph Sarmiento ang imbitasyon sa defense team ni Vice President Sara Duterte nga motindog isip usa sa ilang mga saksi sa pormal nga impeachment trial.
Sa usa ka opisyal nga pahayag, gipahayag sa kanhi dean sa University of St. La Salle College of Law nga bisan ug nagpasalamat siya sa pag-ila sa iyang mga legal opinion ug panan-aw nga gipagawas sa social media, gipili gihapon niya ang magpabilin nga independent ug neutral.
Sumala kang Sarmiento, wala niya gilauman nga ang iyang mga online post bahin sa legal ug politikanhong isyu mahimong basihan aron ipatawag siya sa impeachment proceedings.
Bisan pa niana, gipatin-aw niya nga importante kaayo nga mapadayon ang iyang ka-independent isip legal analyst ug akademiko ug kahibalo sa publiko nga walay gidapigan, bisan sa kampo sa depensa o sa prosekusyon.
