Nagpagawas ang Energy Regulatory Commission (ERC) og 24 ka Show Cause Orders batok sa 13 ka generation companies human milapas sa gitakdang limitasyon ang wala damhang pagsuspenso sa operasyon sa ilang mga planta sa kuryente.
Kabahin kini sa hugot nga pagpatuman sa ERC sa reliability performance standards, gumikan sa mga report sa balik-balik nga kakulang sa suplay sa kuryente ug taas nga bayranan sa Visayas ug Mindanao.
Una nang nagpadala ang ahensya og mga pahibalo ngadto sa 25 ka kompanya aron mangayo og katin-awan kalabot sa mga insidente sa pagkaguba sa ilang mga pasilidad.
Gimandoan ang mga kompanya nga mosumite og beripikadong tubag samtang padayon nga gisusi sa ERC ang ilang mga dokumento ug rekord.
Gipasabot sa komisyon nga kinahanglan una ang hustong proseso ug igo nga ebidensya sa dili pa magpatuman og silot batok sa mga kompanyang mapamatud-ang nakalapas sa mga sumbanan.
Gipaniguro usab sa ERC nga padayon nilang bantayan ang kahimtang sa suplay sa kuryente aron mapanalipdan ang interes sa mga konsumidor sa tibuok nasud.
