Gihangyo sa kampo ni kanhi House Speaker Ferdinand Martin Romualdez ang brodkaster nga si Ramon “Mon” Tulfo nga bawion o korehion ang iyang pahayag nga sekretong makagawas ug makabalik sa New Quezon City Jail ang kanhi opisyal.
Gipasidan-an sa legal team ni Romualdez nga mosang-at sila og tukmang legal nga aksyon batok kang Tulfo kung dili niya tumanon ang ilang pormal nga hangyo.
Sa sulat nga gipetsahan og Nobyembre 4, giingon sa abogado nga si Felix Michael Villa nga walay kamatuoran ang alegasyon nga gipatik ni Tulfo sa Facebook niadtong Nobyembre 3.
Gipadayag sa kampo ni Romualdez nga nagpabilin siyang napriso sukad sa iyang pagpasulod sa New Quezon City Jail niadtong Septiyembre 14, 2026 ug wala pa sukad makagawas sa pasilidad.
Gipangayo usab nila nga tangtangon o korehion ni Tulfo ang iyang post, magpagawas og publikong pagpatin-aw ug dili na usbon ang pagpakalat sa maong impormasyon.
Sa lahi niyang pahayag, giangkon ni Tulfo nga hinimo-himo lamang sa iyang source ang impormasyon ug nasayop siya kay wala kini una niya mapamatud-i sa wala pa ipatik, bisan wala siya pormal nga nangayo og pasaylo.
