Gipili ni Presidente Ferdinand Marcos Jr. si Supreme Court Associate Justice Rodil V. Zalameda isip bag-ong Chief Justice sa Korte Suprema nga mopuli kang Chief Justice Alexander Gesmundo nga moretiro ugma, Nobyembre 6.
Gipahibalo ni Presidential Communications Office Secretary Lino Cayetano ang maong appointment niadtong Huwebes.
Matod ni Cayetano, kapin sa tulo ka dekada ang kasinatian ni Zalameda sa serbisyo publiko ug sa sistema sa hustisya, lakip na ang iyang pagserbisyo isip opisyal sa korte, public prosecutor, ug mahistrado sa Court of Appeals ug Supreme Court.
Gipasalig usab sa Palasyo nga gisaligan ni Presidente Marcos ang abilidad ni Zalameda sa pagdumala sa hudikatura nga adunay integridad, walay pagpihig ug lig-on nga pagsunod sa balaod.
Samtang, nagpaabot usab ang Palasyo og pasalamat kang Gesmundo tungod sa iyang dedikadong pagserbisyo sa nasud.
