Patay ang upat ka tawo human mibuto ang usa ka himoanan og pabuto sa lungsod sa Malasiqui, Pangasinan.
Gikumpirma ni Malasiqui Vice Mayor Daria Dolores Mamaril ang pagkamatay sa mga biktima nga nahitabo pasado alas-7:30 sa gabii, Miyerkules, Nobyembre 4.
Lakip sa mga namatay ang usa ka pito ka tuig nga bata, samtang usa pa ka tawo ang gikataho nga missing.
Nadamay usab sa dakong sunog ang usa ka sakyanan nga giparking duol sa lugar.
Base sa inisyal nga imbestigasyon, nakadungog og kusog nga pagbuto ang mga residente sa kasikbit nga Barangay Tabo Sili ug Calbueg sa wala pa midilaab ang sunog.
Nahimutang ang maong ilegal nga himoanan og pabuto sa utlanan sa duha ka barangay.
Gigamit isip himoanan og pabuto ang usa ka gibiyaan nang babuyan nga giabangan sa mga biktima alang sa paghimo sa mga pabuto.
Nagpadayon ang imbestigasyon sa mga otoridad kalabot sa maong insidente.
