Gipahayag sa Police Regional Office 12 nga malinawon ug hapsay ang pagsaulog sa Kalag-kalag 2026 sa tibuok rehiyon sa SOCCSKSARGEN.
Matud ni PBGEN Alan Manibog, Regional Director sa PRO-12, nahimong hapsay ang paghinumdom sa mga namatay nga minahal tungod sa koordinadong security operations sa kapulisan, pakigtambayayong sa nagkadaiyang ahensya sa gobyerno ug kooperasyon sa mga lokal nga pangagamhanan.
Kapin 5,200 ka personnel ang gipakatap sa nagkadaiyang lugar sa rehiyon, lakip na sa mga sementeryo, memorial parks, simbahan, terminal ug uban pang pampublikong lugar.
Gipasalamatan ni Manibog ang katawhan sa ilang disiplina ug kooperasyon nga nakatabang sa pagmintinar sa kalinaw ug kahusay atol sa Undas.
Gipasalig usab sa PRO-12 nga magpadayon ang ilang security ug crime prevention operations bisan human sa pagsaulog sa Kalag-kalag.
