Nakit-an nga patay sulod sa iyang kwarto ang 69-anyos nga si Alejandro Agatep, residente sa Malvar Street, Tacurong City, Sultan Kudarat, alas 7:30 sa buntag karong adlawa Nobyembre 3, 2026.
Base sa report sa Tacurong City Police Station, nangayo og tabang sa kapulisan ang silingan sa biktima nga si Jane Bernasol human dili na maagwanta ang baho nga naggikan sa balay ni Agatep.
Matud sa mga silingan, mga duha na ka adlaw nilang namatikdan ang dili maayong baho apan una nilang gituohang gikan lamang kini sa patay nga hayop sa palibot.
Pag-abot sa mga pulis, naka-lock ang balay hinungdan nga ilang giablihan aron masusi ang kahimtang sa nagpuyo niini ug didto nadiskubrehan ang walay kinabuhi nga lawas sa biktima sulod sa kwarto.
Sa inisyal nga pagsusi, walay nakitang timailhan sa panag-away, pagpanghilabot o makita nga samad sa lawas sa biktima nga nagtimaan sa posibleng foul play.
Nakaplagan usab sa imbestigasyon nga nag-inusara lamang og puyo si Agatep ug adunay nauna nang balatian lakip ang high blood pressure ug sakit sa prostate.
Matod sa kapulisan, mga usa ka semana sa wala pa siya nadiskubrehan, mitabang na kaniya ang City Disaster Risk Reduction and Management Office human wala kini makita sa gawas sa ilang balay sulod sa tulo ka adlaw.
Wala usab magduda ang pamilya nga adunay foul play sa pagkamatay sa biktima ug mipirma sila og waiver nga dili na ipa-autopsy ang iyang mga patayng lawas.
Gidala na ang lawas sa biktima sa Collado Funeral Home alang sa hustong pag-atiman ug serbisyo sa lubong.
Wala pa mag-angkon og pinal nga konklusyon ang kapulisan sa hinungdan sa pagkamatay tungod kay ang report naghulagway lamang sa inisyal nga kahimtang nga ilang nakita.
