Nagkolekta og kapin sa 10,000 ka CD ang 67-anyos nga si Andrew Wales gikan sa London, nga iyang gitipigan sa nagkalainlaing bahin sa iyang balay.
Matud ni Wales, mas gusto niya ang pagpaminaw og musika pinaagi sa CD kaysa paggamit sa Spotify tungod kay naanad na siya sa mga pisikal nga kopya sa mga kanta. Mas praktikal usab kini kay dili kaayo dako og espasyo kon itandi sa vinyl records.
Nagsugod siya sa pagkolekta og CD niadtong 1991, sa dihang mipalit usab siya sa iyang unang CD player. Mas gipili niya kini tungod sa kalidad sa mga vinyl records niadtong panahona ug sa pipila ka kanta nga anaa sa CD apan wala sa LP versions.
Gawas sa iyang kapin 10,000 ka CD, aduna usab siyay gibana-banang 2,000 ka vinyl records, gatusan ka cassette tapes ug nagkadako nga koleksyon sa Blu-ray discs.
