Gisupak sa defense team ni kanhi Presidente Rodrigo Duterte ang hangyo sa prosekusyon sa International Criminal Court kon ICC nga dawaton isip ebidensiya ang naunang narekord nga mga testimonya sa duha ka saksi sa kasong crimes against humanity nga giatubang niini.
Gipadayag sa depensa nga kinahanglan moagi sa ‘cross-examination’ sa korte ang maong mga saksi.
Sa usa ka publikong dokumento nga adunay mga bahin nga wala ipadayag, nga gipetsahan kagahapon, Oktubre 26, gihangyo sa depensa ang ICC Trial Chamber III nga isalikway ang hangyo sa prosekusyon nga dawaton isip ebidensiya ang naunang narekord nga mga testimonya sa mga saksi nga sila P-1393 ug P-1416.
Apan, wala mosupak ang depensa sa pagdawat isip ebidensiya sa testimonya sa ikatulong saksi nga si P-1370. Matod sa depensa, naghisgot ang mga testimonya nila P-1393 ug P-1416 bahin sa mga isyung gilalisan ug importante sa kaso.
Tungod niini, ilang gipunting nga kinahanglan pang susihon pag-ayo ug pangutan-on ang mga saksi aron matino ang kredibilidad sa ilang mga pahayag.
Gihangyo sa prosekusyon nga dawaton isip ebidensiya ang naunang narekord nga mga testimonya sa tulo ka saksi subay sa Rule 68(2)(b) sa ‘Rules of Procedure and Evidence’ sa ICC.
Gitugotan sa maong patakaran ang pagdawat sa naunang narekord nga mga testimonya ubos sa partikular nga mga kondisyon, bisan wala moatubang sa korte ang saksi.
