Wala pa makadawat ang Philippine National Police (PNP) og bisan unsang timailhan nga andam nang motahan si Senador Ronald “Bato” Dela Rosa.
Matod ni Police Colonel Allen Rae, tigpamaba sa PNP, wala pa silay nakita nga timailhan sa pagtahan sa senador bisan pa sa usa ka semana nga palugit nga gihatag kaniya sa mga awtoridad.
Dugang pa sa opisyal, kini na ang higayon alang kang Dela Rosa nga tapuson ang iyang pagtago ug motahan sa mga awtoridad sa malinawon ug dungganong paagi.
Nagpadala na ang PNP og dugang mga tracker team aron masubay ang nahimutangan sa senador.
Bisan pa niini, mas gipalabi gihapon sa mga awtoridad nga boluntaryo siyang motahan aron malikayan ang posibleng dili maayong panghitabo.
Kahinumdoman nga gipahibalo sa publiko ang paghatag og ganti nga mokabat sa ₱50-M alang sa bisan kinsa nga makahatag og kasaligan nga impormasyon nga makatabang sa pagtino sa nahimutangan ni Dela Rosa.
Base sa pinakabag-ong impormasyon nga gikutlo gikan sa Department of the Interior and Local Government (DILG), gituohang anaa sa Mindanao si Dela Rosa ug gipanalipdan sa usa ka armadong grupo.
Gipangita si Dela Rosa may kalabotan sa kaso sa ‘crimes against humanity’ nga giatubang sa International Criminal Court (ICC), nga nalambigit sa kampanya batok sa ilegal nga droga atol sa administrasyon ni kanhi President Rodrigo Duterte.
