GENSAN- Giawhag ni Police Colonel Ariel Acala, City Director sa General Santos City Police Office o GSCPO, ang mga kabatan-onan sa dakbayan nga nagtinguha nga mahimong pulis sa umaabot nga mokuha sa Philippine National Police Academy Cadet Admission Test nga ipahigayon ugma, Domingo, sa Ramon Magsaysay Memorial Colleges sa Barangay Lagao.
Gihulagway ni Acala ang maong eksaminasyon isip oportunidad alang sa mga batan-on nga gustong mosulod sa Philippine National Police pinaagi sa Philippine National Police Academy.
Giawhag niya ang mga aplikante nga mangandam pag-ayo, andamon ang ilang panghunahuna ug magpabiling kalmado atol sa eksaminasyon aron mas makatubag sa mga pangutana.
Matud ni Acala, libre ang pag-eskwela sa akademya ug ang mga maka-graduate mahimong ‘commissioned officers’ sa PNP.
Gidasig ni Acala ang mga kabatan-onan nga pahimuslan ang maong oportunidad isip unang lakang sa pagtuman sa ilang pangandoy nga mahimong opisyal sa kapulisan.
