MAASIM, SARANGANI- Kapin sa 3,000 ka panimalay sa Maasim, Sarangani Province ang nakadawat og ayuda nga bugas pinaagi sa Bagong Pilipinas Rice Assistance Program ubos sa Local Government Support Fund.
Mokabat sa 3,053 ka pamilya gikan sa 16 ka barangay sa maong lungsod ang nakabenepisyo sa duha ka adlaw nga distribusyon sa bugas niadtong Oktubre 21 ug 22.
Gipahigayon ang maong programa pinaagi sa Provincial Government of Sarangani ubos sa flagship program ni Governor Rogelio “Ruel” D. Pacquiao nga Ronda Probinsya, sa koordinasyon sa lokal nga panggamhanan sa Maasim.
Tumong sa maong inisyatiba nga mapalig-on ang seguridad sa pagkaon, masuportahan ang lokal nga agrikultura ug masiguro nga maabot ang hinabang sa gobyerno bisan sa pinakalayong mga komunidad sa probinsya.
