Nagkaatbang sa unang higayon ang Pinay tennis star ug kasamtangang World No. 20 nga si Alex Eala ug ang Russian star nga si Diana Shnaider sa Round of 16 sa WTA 500 Ningbo Open ning adlawa, Huwebes, Oktubre 22, 2026.
Sa unang set pa lamang, gipakita na sa duha ka magdudula ang ilang kusog nga panagsangka pinaagi sa hugot nga pagbayloay sa puntos. Apan sa ulahing bahin sa set, nakuha ni Shnaider ang momentum ug midaog sa unang set, 7-5.
Nagpadayon ang ilang dula sa ikaduhang set diin sunod-sunod ang mga service break. Nakalamang pa si Eala, 4-3, apan dali kining gibawi ni Shnaider hangtod nga nakakuha kini og mga match point.
Wala mihunong si Eala sa pagpakigbisog bisan pa og anaa na sa match point ang iyang kontra. Nakagukod pa ang Pinay star ug naluwas ang pito ka match point. Apan sa kataposan, giselyohan ni Shnaider ang kadaugan pinaagi sa usa ka service ace, 6-4.
Tungod sa kapildihan, napakyas si Eala nga makauswag sa quarterfinals o Round of 8 sa maong torneyo.
Sunod nga makigkompetensiya si Eala sa Toray Pan Pacific Open sa Japan, nga ipahigayon gikan Oktubre 26 hangtod Nobyembre 1.
