GENSAN- Gipahinumdoman sa Philippine Institute of Volcanology and Seismology kon PHIVOLCS-Gensan, ang publiko nga magpabiling kalmado ug sundon ang hustong pamaagi sa pagpanalipod sa kaugalingon panahon sa linog, ilabi na kon anaa sa sulod sa mall, eskwelahan, opisina o balay.
Sumala kang Nane Danlag sa PHIVOLCS GenSan, importante nga bantayan ang mga butang nga posibleng mahulog ug makasamad panahon sa pag-uyog sa yuta.
Matod pa niya ang pamaaging “Duck, Cover, and Hold,” diin kinahanglan nga moduko, mangita og luwas nga dapit nga kapasilongan ug ibutang ang kamot sa ulo aron mapanalipdan ang kaugalingon gikan sa mga mahulog nga butang ug debris.
Matod ni Danlag, likayan ang pagdagan-dagan panahon sa linog tungod kay mahimo kining hinungdan sa pagkadagma nga makaresulta og kaangol sa mga tawo.
Dugang pa niya, hulaton lamang nga mohunong ang pag-uyog sa yuta usa mogawas sa building, samtang mag-amping gihapon sa posibleng mahulog nga mga butang.
Giawhag usab sa PHIVOLCS ang publiko nga palig-onon ang kahibalo ug kaandam sa linog aron malikayan ang mga samad ug uban pang peligro panahon sa maong kalamidad.
