Wala damha sa usa ka amahan sa United States nga ang iyang yano nga pag-apil sa one-mile road race uban sa usa ka tuig nga anak mahimong mosangpot sa bag-ong world record.
Nakapuntos og record si 30-anyos nga Stephen Biebelhausen human niyang nahuman ang usa ka milyang lumba sulod lang sa 4 minutos ug 17.784 segundos samtang giduso ang iyang anak nga si Blake diha sa stroller.
Nahimo niya kini sa Guardian Mile, usa ka tinuig nga lumba nga gihimo sa Hope Memorial Bridge sa Cleveland, Ohio.
Ang unang tumong lamang ni Stephen mao ang paglupad sa course record nga 4 minutos ug 44 segundos, apan wala niya damha nga malabwan usab niya ang Guinness World Record.
Matud niya, wala siya nagbuhat og espesyal nga training ug kasagarang modagan lang tulo hangtod upat ka beses matag semana uban sa iyang anak.
Giangkon usab ni Stephen nga mas lisod ang pagdagan samtang nagduso og stroller, apan mawala kuno iyang kakapoy matag madungog niya ang katawa sa iyang anak.
Saksi sa maong makasaysayanong pagdagan ang iyang asawa nga si Meghan, nga anaa sa daplin sa race course aron mosuporta sa mag-ama.
Para sa magtiayon, usa kini ka istorya nga ilang ikapasigarbo ug ilang ikasulti kang Blake inig kadako niini.
