Gipangguba sa militar sa Israel ang underground infrastructure sa Hezbollah sa Ali al-Taher ridge sa habagatang Lebanon aron mapalig-on pa ang gitawag niini nga security zone sa maong lugar.
Sa pahayag nila ni Prime Minister Benjamin Netanyahu ug Defence Minister Israel Katz, ilang giingon nga magpabilin ang mga pwersa sa Israel sa rehiyon aron pugngan ang Hezbollah sa pag-organisar pag-usab ug pagpalig-on sa ilang grupo.
Sumala sa militar sa Israel, ilang nakontrol ang kapin duha ka kilometros nga mga tunnel diin gitago ang mga rocket, missile, drone ug uban pang mga gamit panggubat sa Badr unit sa Hezbollah.
Nadungog ang kusog nga mga pagbuto sa rehiyon sa Nabatieh samtang nagpadayon ang operasyon bisan pa sa kasabutan sa ceasefire niadtong Hunyo.
Nagpabiling alanganin ang maong kasabutan human dili mosugot ang Hezbollah nga itugyan ang ilang mga armas, samtang dili usab mobiya ang Israel hangtod nga ma-disarma ang grupo.
Nagtukod usab ang Israel og mga estratehikong posisyon sa habagatang Lebanon sukad niadtong 2023 aron magsilbing buffer zone batok sa mga hulga gikan sa Hezbollah.
